Mësiti merr 2 mijë euro, për martesën e një serbi me një shqiptare

Tema e martesave mes vajzave shqiptare me serbët e zonave rurale ka bërë bujë në median shqiptare dhe të huaja.

Martesat e vajzave shqiptare nga veriu i Shqipërisë me djemtë serbë vazhdon të mbetet temë interesante edhe në mediet e huaja, për shkak të urrejtjeve ndëretnike ndërmjet këtyre dy popujve ballkanik.  Së fundi është revista e njohur “Vice” e cila vjen me foto reportazh nga një prej këtyre martesave, të cilat janë konkretizuar me ndihmën e mësitëve (ndërmjetësuesve), të cilët kanë marrë dy mijë euro për një martesë.

Sanja Knezeviç shkruan se në fshatrat serbe mungojnë vajzat e reja, ndërsa e kundërta ndodh në Shqipëri, në fshatra mungojnë djemtë e rinj. Këtu hyn në punë Vera, e cila rregullon martesat mes vajzave shkodrane dhe burrave serbë. Vera merr rreth 2 mijë euro për shërbimin e saj ndërmjetësuese.

Revista dokumenton me foto ardhjen e serbit 44-vjeçar Milovan në Shkodër për të kërkuar dorën e Evës 22-vjeçare. Pasi gjyshja e Evës thotë PO, Milovani paguan 115 dollarë tek familja e saj dhe shkon për të blerë bizhuteri dhe rroba për të fejuarën. Pas tre javësh, fermeri Milovan kthehet dhe e merr Evën për grua, shkruajnë mediet shqiptare, citon 21.

Revista dokumenton me foto mbërritjen e Milovanit, pranimin e familjes shkodrane, blerjen e mallrave, udhëtimin e Evës drejt Serbisë dhe mbërritjen e saj në shtëpinë e Milovanit ku do kalojë pjesën e mbetur të jetës.