Votat e diasporës i fiton Vetëvendosje, 71 për qind

Nga votat e numëruara të diasporës, në zgjedhjet e 11 qershorit, Lëvizja Vetëvendosje(VV), ka rezultuar të jetë partia më e votuar

Edhe pse diaspora ka vite që anashkalohet nga institucionet kosovare sa i përket vendimmarrjes, prapë  ata pak votues sa kanë votuar nëpërmes postës, janë përcaktuar për Lëvizjes Vetëvendosje. Kjo e fundit e cila është radhitur e dyta në nivel vendi, ka fituar mbi 70 për qind të votave nga diaspora.

Nga 3841 vota, Vetëvendosje ka fituar 2730 vota, e përkthyer në përqindje, që i bien 71 për qind. Derisa koalicioni LDK – AKR – Alternativa (LAA), ka marrë 601 vota, respektivisht 16 për qind, dhe në fund ka mbetur koalicioni PDK – AAK dhe Nisma (PAN), ka fituar 510 vota, që nënkupton 13 për qind të votave.

Për këto vota, sekretari organizativ i Lëvizjes Vetëvendosje, Dardan Molliqaj i ka falënderuar mërgimtarët për mbështetjen që i kanë dhënë këtij subjekti politik, duke i uruar ata për fitoren e Vetëvendosjes. Madje ai në rrjetin social facebook, ai thotë se diaspora është më meritorja që LVV ka dyfishuar numrin e votave në zgjedhjet e djeshme, duke u renditur subjekti i dytë politik më i votuar në Kosovë.

“Dua t’i falënderoj posaçërisht ata që janë më meritorët për këtë përmbysje të madhe të rezultatit. Ata që asnjëherë nuk hezituan ta ndihmojnë vendin. Ata që e ndihmuan luftën. Ata që e mbajtën dhe po e mbajnë gjallë ekonominë tonë. Faleminderit nga zemra të dashur mërgimtarë!”, ka shkruar menjëherë  pas zgjedhjeve, Dardan Molliqaj.