Prishtina me treg të luleve, ndihmohet nga qeveria zvicerane

Kryetari i Prishtinës, Shpend Ahmeti është shprehur se ky projekt është realizuar në bashkëpunim me qeverinë zvicerane dhe DEMOS-in, me qëllim të përmirësimit të hapësirave publike

Edhe Prishtina është bërë me Tregun e Luleve. Ky treg është hapur në Sheshin “Skënderbeu”, raporton albinfo.ch.

Ky treg është i pari i këtij lloji, dhe iu ofron mundësi prodhuesve që t’i shesin lulet e tyre në një hapësirë të caktuar, në një nga sheshet kryesore të qytetit.

Kryetari i Prishtinës, Shpend Ahmeti është shprehur se ky projekt është realizuar në bashkëpunim me qeverinë zvicerane dhe DEMOS-in, me qëllim të përmirësimit të hapësirave publike.

“Këtu janë 6 kiosqe, për shfrytëzimin e të cilave kemi hapur konkurs ku kemi ftuar të gjitha kompanitë e luleve. Janë pranuar 11 aplikacione, dhe me rotacion do t’ia mundësojmë secilës nga këto kompani shfrytëzimin e këtyre kiosqeve”, deklaroi i pari i Prishtinës.