E lë të moshuarin të vdes në rrugë, arrestohet një qytetar në Gjilan

I arrestuari është shofer i kamionetes, i cili nuk u ndal për t’i dhënë ndihmë një të moshuari, që bdiq në rrugë

Policia rajonale e Gjilanit ka arrestuar një person me akuzën se nuk i ka ofruar ndihmë të moshuarit që vdiq në rrugë para disa ditësh. Sipas njoftimit të policisë, personi që është arrestuar, është shoferi i një kamionete, i cili shihet në pamjet e videove që qarkulluan në internet, duke mos ndjerë keqardhje për viktimën.

“Policia e Kosovës njësitet e hetimeve Rajonale në bazë të shënimeve dhe video incizimeve të marra me rastin e personit të vdekur më datë 01.07.2017, ku viktima ka vdekur në rrugë, dhe shihet se disa automjete vetëm kanë vazhduar rrugën dhe nuk i kanë ofruar ndihmë personit të sëmurë-shtrirë në rrugë. Është identifikuar njërin nga vozitësit e kamionetës, i cili ka kaluar aty afër dhe nuk është ndalur për të ofruar ndihmë”, thuhet në njoftim.

Personi i identifikuar, sipas Policisë, është thirrur për intervistë dhe në konsultim me prokurorin e çështjes i njëjti është intervistuar në cilësinë e të dyshuarit nën prezencën e mbrojtësit të tij personal dhe ai akuzohet për veprën penale “Mosdhënia e ndihmës” në bazë të nenit 191 të Kodit Penal të Republikës së Kosovës. Të njëjtit nga ana e prokurorit të shtetit iu ka lëshuar vendimi mbi ndalim policor për 48 orë”, thuhet në njoftimin e Policisë .