Tmerri në rrugët e Kosovës, vetëm në qershor 15 të vdekur

Sipas të dhënave të përgjithshme, aksidentet me fatalitet gjatë muajit qershor kanë shënuar rritje në krahasim me periudhën e njëjtë të vitit kaluar

Rrugët e Kosovës janë shndërruar në kasaphanë të vërtetë, pasi vetëm gjatë muajit qershor, 15 qytetarë e kanë humbur jetën dhe rreth 1200 janë lënduar nga aksidentet në trafik. Sipas Policisë së Kosovës, aksidentet me fatalitet po vijnë kryesisht nga intensiteti i madhe i veturave dhe pakujdesia e drejtuesve të automjeteve.

“Sipas të dhënave të përgjithshme aksidentet me fatalitet gjatë muajit qershor kanë shënuar rritje, që do të thotë krahasuar me periudhën e njëjtë të vitit paraprak kemi (4) persona më shumë që kanë humbur jetën si pasojë e aksidenteve rrugore”, thuhet në përgjigjen e Zyrës për Informim të Policisë së Kosovës.

Më tej, kjo zyrë ka bërë të ditur se gjatë sezonit veror, në funksion të një menaxhimi dhe kontrolli më të mirë të sigurisë, veçanërisht të trafikut rrugor Policia e Kosovës ka përpiluar një plan operativ policor, për zbatimin e masave ligjore që do të ndërmerren në vazhdimësi për të gjithë ata që nuk u përmbahen rregullave në trafik.

“Gjithashtu nga divizioni i trafikut rrugorë i PK-së janë përpiluar dhe shpërndarë fletëpalosje (gjeni te bashkangjitur) me udhëzime dhe mesazhe vetëdijesuese për të ndikuar në uljen e aksidenteve me fatalitet që mbeten një shqetësim apo brengë për të gjithë ne”, thuhet në përgjigjen e Policisë, raporton lajmi.net.

Në fund, Policia e Kosovës ka apeluar tek të gjithë pjesëmarrësit në trafik e në veçanti tek vozitësit që të respektojnë rregullat e komunikacionit në mënyrë të që evitohen aksidentet.