Mrekullia e kanioneve të lumit Erzen afër Tiranës

Kohët e fundit kanionet në lumin Erzen janë shumë të vizituara, një atraksion i jashtëzakonshëm për turistët. Lumi ndodhet vetëm 20 kilometra larg Tiranës

Kryeqyteti shqiptar, Tirana njihet  për jetën e natës dhe mundësitë e shumta që t’i ofron për t’i vizituar. Por, vendet kulturore, historike nuk janë arsyeja e vetme që mund ta vizitoni kryeqytetin shqiptar, shkruan albinfo.ch.

Kohët e fundit kanionet në lumin Erzen janë shumë të vizituara, një atraksion i jashtëzakonshëm për turistët. Lumi ndodhet vetëm 20 kilometra larg Tiranës.

Këto kanione ndodhen përgjatë rrjedhës së lumit Erzen. Uji i këtij lumi që rrjedh në një terren shkëmbor gjatë shekujve ka krijuar kanione spektakolare. Uji i kristaltë dhe thellësia e kanioneve të krijon mundësi të lahesh apo të notosh. Në pjesën ku lumi ka një thyerje rreth 10 m është krijuar një ujëvarë brenda një guve. Përpara ujëvarës te kanionet ka vaska të cilat në stinën e nxehtë përdoren për tu larë dhe për të bërë banjo dielli.

Kanionet e Erzenit janë një zgjedhje e mirë për çdo shpirt aventurier. Natyra e tyre ka menduar për gjithçka.

Lumi i Erzenit është i gjatë 108 km, me prurje rreth 102 l/sek. Erzeni buron nga zona e Gurakuqit, në një lartësi mbi 1300 m mbi nivelin e detit, në lindje të Tiranës, dhe derdhet në Gjirin e Lalëzit, në veri të Durrësit. Në zonën e sipërme të rrjedhës së tij, Erzeni ka gërryer një shtrat të ngushtë në shkëmb, dhe më pas deri në afërsi të Tiranës ka një shtrat me zhavorr, që i le vendin një shtrati më të ngushtë e më baltor pasi i afrohet Durrësit.