Mustafa kërkon nga PAN-i që të zhbllokojë kuvendin

"Shfrytëzoni të drejtën që e ka dhënë Gjykata Kushtetuese, por jo pa kufi. Krijoni kushte të themelohen institucionet e vendit dhe mos e mbani vendin peng"

Kryeministri në detyrë dhe kreu i LDK-së, Isa Mustafa ka reaguar pas deklaratave të kreut të PDK-së Kadri Veseli. Ai ka shkruar në profilin e tij ne facebook duke kërkuar nga koalicioni PAN që ta shfrytëzojnë të drejtën që e ka dhënë Gjykata Kushtetuese me aktvendimin e vitit 2014.

“Përgjegjësit për të themeluar institucionet e kanë adresën e tyre. Janë ata që organizuan dhe ekzekutuan mosbesimin ndaj Qeverisë. Nuk kanë nevojë të vonohen, as të kërkojnë orë e ditë shtesë, sepse lidershipi nuk krijohet për një ditë. Kushte nuk ka. Shfrytëzoni të drejtën që e ka dhënë Gjykata Kushtetuese, por jo pa kufi. Krijoni kushte të themelohen institucionet e vendit dhe mos e mbani vendin peng”, ka shkruar ai, transmeton albinfo.ch.

Mustafa ka shtuar se partia e tij së bashku me partnerët e koalicionit e shohin vendin ndryshe. “Jo me ju në qeverisje. Ne kemi dije dhe jemi të përgjegjshëm që këtij vendi t’ia ofrojmë zgjidhjen më të mirë”, ka shkruar Mustafa.