Zjarret përfshijnë edhe Maqedoninë

Gjatë kësaj vere, zjarrfikësit në Tetovë kanë intervenuar në gjithsej 357 zjarre, 170 prej të cilave kanë qenë në sipërfaqe të hapura dhe të shkaktuara nga faktori njeri

Rajoni malor i komunës së Tetovës është përfshirë nga zjarret vetëm pak ditë pasi zjarrëfiksit arritën ta lokalizonin zjarrin në  pikën turistike Matka.

Njësia territoriale kundër zjarrit në Tetovë alarmon për mundësinë e përhapjes së zjarrit. Ata thonë se vendi është i  papërshtatshëm dhe nuk ka qasje në atë zonë ku është prekur nga flakët dhe mund të rrezikojë edhe banorët që jetojnë rrëzë malit njofton televizoni Alsat.

“Për momentin jemi duke intervenuar në katër raste, në disa lokalitete të Komunës së Tetovës dhe rrethinës së saj, pra komunave rurale. Jemi të shqetësuar shumë për zjarrin që na u imponua nga ana e Shkupit, sepse në vendin e quajtur mbi Kopanicë nga Radusha, ai zjarr është duke u zgjeruar dhe vjen nga ana jonë. NJTKZ ka kapacitete të merret me këto zjarre por ai kapacitet që e kemi të automjeteve kanë filluar të amortizohen, kemi mungesë të mjeteve për shuarje të zjarreve nëpër pyje, fusha etj”, ka thënë komandanti i njësisë së zjarrfikësve Uka Aliti.

Gjatë kësaj vere, zjarrfikësit në Tetovë kanë intervenuar në gjithsej 357 zjarre, 170 prej të cilave kanë qenë në sipërfaqe të hapura dhe të shkaktuara nga faktori njeri.