Situatë dramatike e zjarreve në Shqipëri, apel për kujdes

Ministrja e mbrojtjes, Mimi Kodheli ka thënë se mjetet e ushtrisë, përfshirë helikopterët kanë qenë përditë në misione për shuarjen e zjarreve

Ministrja e Mbrojtjes në Shqipëri, Mimi Kodheli, ka thënë se për situatën dramatike që është aktualisht në Shqipëri me zjarret e shumta, 1 e 3 e ushtrisë ka qenë e angazhuar.

Ajo ka bërë të ditur se operacionet i kanë kushtuar vendit rreth 30 milionë lekë.

Kodheli ka thënë se mjetet e ushtrisë, përfshirë helikopterët kanë qenë përditë në misione për shuarjen e zjarreve. Ajo ka apeluar qytetarët që të kenë kujdes më të shtuar, kur kushtet klimaterike favorizojnë zjarret, raporton Top-Channel.

“Kjo është një situatë dramatike jo vetëm për Shqipërinë, por për Europën mbarë. I bëj thirrje të gjithë qytetarëve për të kontribuar në përballimin e situatës. I bëj thirrje edhe që të mos e krijojnë situatën”, tha Kodheli.

Nga radhët e ushtrisë ka pasur dhe një të lënduar gjatë fikjes së zjarreve. Për këtë, Skënder Hidrit iu akordua dhe një medalje.

“Tetar Hidrit, i cili është plagosur gjatë një operacioni të shuarjes së zjarreve në Shëngjergj të Tiranës, i akordoj Medaljen për Shërbime të Shquara”, u shpreh Kodheli.