Renditja e FIFA-s: Zvicra në vendin e 4, Shqipëria e 63-ta, Kosova e 180-ta

Në renditjen e FIFA-s për muajin gusht, Shqipëria mbetet në vendin e 63-të, kurse Zvicra me Shaqirin, Xhakën, Xhemajlin, Behramin..., është ngritur në vendin e 4-të të toplistës botërore të futbollit

Federata Ndërkombëtare e Futbollit (FIFA) e ka publikuar sot renditjen më të re të kombëtareve të futbollit, sipas së cilës, Brazili ngjitet në vendin e parë duke ia rrëmbyer primatin Gjermanisë, ndërsa e veçanta është se në katërshen më të fuqishme të botës është edhe Zvicra me Shaqirin, Xhakën, Xhemajlin, Behramin…

Sipas njoftimit, vendin e parë nga Gjermania e ka rrëmbyer Brazili me 1604 pikë. Gjermania tani bie për një vend më poshtë dhe tash renditet e dyta me 1549 pikë. Në vendin e tretë mbetet Argjentina me 1399 pikë, kurse Zvicra është ngritur në vendin e katërt me 1329 pikë, Polonia është e pesta me 1319 pikë.

Portugalia ka rënë nga vendi i pestë në të gjashtin me 1267 pikë, Kili është i shtati me 1250, në të tetin mbetet sikur edhe herën e kaluar Kolumbia me 1208 pikë, Belgjika është ngritur në vendin e nëntë me 1194, ndërsa top dhjetëshen e parë e përmbyll Franca me 1157 pikë.

Kombëtarja e Shqipërisë mbetet sikur edhe herën e kaluar në vendin 63 me 583 pikë, derisa Kosova ka shënuar rënie për tri vende dhe tash renditet në vendin 180 me 90 pikë. Shqipëria është ajo që ka lënë përshtypje të këqija, pasi në një periudhë ishte në mesin e 30 shteteve me futbollin më të mirë në botë.