Sot vazhdon seanca konstituive e Kuvendit të Kosovës

Deri më tash zgjedhja e organeve të kuvendit ka dështuar katër here për shkak të mos pjesëmarrjes në seancë të deputetëve të koalicionit PAN të cilët e kanë të drejtën për ta propozuar emrin e kreut të Kuvendit

Deputetët e Kuvendit të Kosovë do të mblidhen sërish sot për të tentuar që për herën e pestë të mund të zgjedhin organet drejtues të tij, transmeton albinfo.ch. Kryesuesi i kuvendit, Adem Mikullocvi  ka ftuar deputetët për vazhdimin e seancës konstituive me pikën e vetme të rendit të ditës zgjedhjen e Kryetarit të Kuvendit dhe e nënkryetarëve të Kuvendit.

Deri më tash zgjedhja e organeve të kuvendit ka dështuar katër here për shkak të mos pjesëmarrjes në seancë të deputetëve të koalicionit PAN të cilët e kanë të drejtën për ta propozuar emrin e kreut të Kuvendit. Ende nuk dihet nëse ata do të marrin pjesë. Ndërsa pas thirrjës së QUINT-it për pjesmarrëje në kuvend dhe zgjedhjen e bllokadës ka reaguar Kryetari i Prishtinës Shpend Ahmeti. Ai ka thënë se QUINT-i i ka bërë thirrje koalicionit PAN që të marrin pjesë në seancën e sotme.

“Quinti i bën thirrje PAN-it me shku në seancë. Mos e zhagitni më. Numrat nuk janë, vazhdojmë me opsione tjera, mos e bllokoni Kosovën. Leni edhe shpifjet ndaj komunës së Prishtinës se nuk ju ndihmojnë. Nuk ka kohë Kosova me prit!”, ka shkruar Ahmeti në Facebook.