Sulmohet fizikisht gazetari Parim Olluri

Në momentin e sulmit, ai ka qenë i shoqëruar nga bashkëshortja e tij, e cila është alivanosur

Sonte rreth orës 22  është sulmuar fizikisht nga disa persona gazetari i njohur dhe drejtori i Gazetës “Insajderi,” Parim Olluri.  Sulmi ndaj tij ka ndodhur në rrugën Bajram Kelmendi në Prishtinë, afër banesës së tij.

Aktualisht, Olluri gjendet në Qendrën Klinike Universitare të Kosovës. Ai ka pësuar lëndime të lehta trupore.

Në momentin e sulmit, ai ka qenë i shoqëruar nga bashkëshortja e tij, e cila është alivanosur, raporton Insajderi.

Policia e Kosovës ka dalur në vendin e ngjarjes dhe po heton rastin.

Lidhur me rastin ka reaguar Asociacioni i Gazetarëve të Kosovës.

“Asociacioni i Gazetarëve të Kosovës e dënon sulmin fizik ndaj kolegut Parim Olluri, i ndodhur në orët e vona të mbrëmjes së sotme. AGK kërkon nga organet e sigurisë që të zbulojnë këtë rast në afat optimal pasi që sulme të tilla, në themel dëmtojnë lirinë e shprehjes dhe medias”, thuhet në komunikatën e AGK-së.

AGK i uron shërim të shpejtë kolegut Olluri si dhe bashkëshortes së tij, të cilët kanë pësuar lëndime trupore gjatë sulmit.

AGK thotë se do të përcjellë me vëmendje këtë rast duke kërkuar efikasitet nga organet e drejtësisë.