Autobusi del nga rruga, dhjetëra të lënduar

Ekipet e ndihmës së shpejtë kanë nxjerrë të lënduarit nga autobusi dhe i kanë transportuar nëpër qendrat spitalore dhe dy nga të lënduarit janë me lëndime më të rënda

Foto ilustrim

26 persona raportohet se janë lënduar si pasojë e daljes nga rruga të një autobusi me targa të Maqedonisë në autostradën Shkup-Veles.

Sipas “Alsat-M”, ekipet e ndihmës së shpejtë kanë nxjerrë të lënduarit nga autobusi dhe i kanë transportuar nëpër qendrat spitalore dhe dy nga të lënduarit janë me lëndime më të rënda.

Në Qendrën Emergjente në Shkup janë pranuar dhjetëra nga pasagjerët e lënduar, njëri prej të cilëve është në gjendje kritike. Në Spitalin e Qytetit janë pranuar gjashtë persona mes të cilëve edhe një person me lëndime më të rënda. Në spitalin e Velesit janë pranuar 8 persona, mes tyre edhe një fëmijë.

Ministria e Brendshme ka njoftuar se aksidenti ka ndodhur rreth orës 19:00 në afërsi të vendit të quajtur “Kulla”. Në njoftim, MPB ka thënë se aksidenti ka ardhur pasi shoferi ka humbur kontrollin dhe ka dalë jashtë rrugës.