Gjermanët ‘nuk i duan’ myslimanët për fqinjë

Sipas një studimi të fundit, një në pesë gjermanë, nuk i do myslimanët për fqinjë

Në Gjermani jetojnë rreth 4.7 milionë myslimanë. Ata ndihen të integruar dhe të lidhur me shoqërinë në të cilën jetojnë. Megjithatë, sipas një studimi të fundit, një në pesë gjermanë, nuk i do myslimanët për fqinjë.

Sipas studimit, 60 % e myslimanëve të Gjermanisë janë pjesë e tregut të punës falë vendeve të siguruara atje, të konsideruara thuajse identike me ato të gjermanëve. Edhe niveli i papunësisë në mesin e tyre rezulton me përmirësim në rang kombëtar.

Hartuesi i raportit, Fondacioni gjerman “Bertelsmann” ka marrë në shqyrtim aftësitë gjuhësore të të vetëdeklaruarve si myslimanë, arsimin, vendin e punës dhe kontaktet e tyre shoqërore në Gjermani, Zvicër, Austri, Francë dhe Mbretërinë e Bashkuar, pa llogaritur këtu të ardhurit pas vitit 2010, raporton “TCH”.

Plot 73% e fëmijëve të lindur nga prindër myslimanë në Republikën Federale u rritën me gjermanishten si gjuhën e nënës. Por, sërish raporti me titull “Myslimanët në Evropë: Të integruar, por të papranuar?”, ka arritur të evidentojë shenja islamofobie në të gjitha vendet e përfunduara në lupën e tij, përcjell albinfo.ch.