Rama ka pritur në Durrës kryeministrat e vendeve të rajonit

I pranishëm është edhe Komisionari për Negociatat e Zgjerimit, Johannes Hahn. Në njoftim thuhet se temat kryesore që do të diskutohen do të jenë tregtia, shërbimet, investimet dhe ekonomia digjitale

Kryeministrat e Ballkanit Perëndimor kanë mbërritur në Durrës ku pritet të zhvillohet takimi joformal i përqendruar kryesisht tek ekonomia. I pranishëm është edhe Komisionari për Negociatat e Zgjerimit, Johannes Hahn.

Në takimin joformal, janë të pranishëm përveç kryeministrit të Shqipërisë, Edi Rama, edhe ai i Kosovës, Isa Mustafa, kryeministri i Maqedonisë Zoran Zaev, ai i Malit të Zi Dushko Markoviq, kryeministrja e Serbisë Ana Brnabiq, kryetari i Këshillit të ministrave të Bosnje dhe Hercegovinës Denis Zvizdiq.

Kryeministrat e Ballkanit Perëndimor takohen janë takuar në Durrës vetëm 3 javë pas takimit të Podgoricës dhe 6 javë pas atij të Triestes. Në njoftim thuhet se temat kryesore që do të diskutohen do të jenë tregtia, shërbimet, investimet dhe ekonomia digjitale.

“Pritet që Kryeministrat e Ballkanit Perëndimor të diskutojnë më tej dhe të garantojnë angazhim maksimal në nivel të lartë në drejtim të zbatimit të Planit Shumëvjeçar të Veprimit për Zonën Ekonomike Rajonale për të cilën u ra dakord në Samitin e Triestes. Gjithashtu, rezultatet e deritanishme të Procesit të Berlinit dhe perspektivat e ardhshme të bashkëpunimit rajonal të Ballkanit Perëndimor do të jenë një nga temat e diskutimit”, thuhet në njoftimin e zyrës së kryeministri të Shqipërisë.