Shqipëria vajton vrasjen e gjyqtares

Ajo ishte kërcënuar edhe më parë nga burri i saj, por askush nuk i doli në mbrojtje. Madje, as shteti dhe ambasadat e huaja

Vrasja e Fildes Hafizi me armë zjarri nga ish-bashkëshorti Fadil Kasemi, ka tronditur Shqipërinë.

Vrasja e gjyqtares nga ish-bashkëshorti solli reagime të shumta, të opozitës dhe qeverisë, që nuk lanë mënjanë as akuzat.

Ajo ishte kërcënuar edhe më parë nga burri i saj, por askush nuk i doli në mbrojtje. Madje, as shteti dhe ambasadat e huaja.

Ministria e Drejtësisë ka reaguar në lidhje me vrasjen e gjyqtares nga ish-bashkëshorti i saj, duke kërkuar ndëshkimin e përgjegjësve që nuk zbatuan urdhrin e mbrojtjes. “Mbrojtja e zonjës Kasemi ka qenë detyrim për autoritetet, të cilat tani duhet të nxjerrin pa u vonuar përgjegjësit dhe të mbajnë përgjegjësi për mosveprimin e tyre”, thuhet në një njoftim e ministrit në detyrë Gazmend Bardhi, raporton “TCH”.

Një tjetër reagim nga ky institucion, ka ardhur nga zv/ministrja dhe ministrja e propozuar Etilda Gjonaj, e cila akuzon sistemin gjyqësor që e liroi autorin e krimit. “Ngjarja ishte një goditje e rëndë për të gjitha ne gratë me pozitë apo pa pozitë, dhe tregoi edhe njëherë për mosfunksionimin e sistemit të drejtësisë, që kërkon në mënyrë imediate pastrimin nga gjyqtarë dhe prokurorë që keqzbatojnë ligjin”, thuhet në reagimin e Gjonajt, përcjell albinfo.ch.

Edhe presidenti i Shqipërisë, Ilir Meta e dënoi vrasjen barbare të gjyqtares dhe kërkoi dënimin e ashpër të autorit. Delegacioni i Bashkimit Evropian në Shqipëri e cilëson ngjarjen të tmerrshme, duke kërkuar një përgjigje të koordinuar nga institucionet përgjegjëse.

Edhe kreu i opozitës Lulzim Basha ka reaguar duke bërë përgjegjës të gjithë për vrasjen e gjyqtares. Për Kryeministrin Edi Rama kjo ngjarje është një mesazh i qartë për zbatimin e reformës në drejtësi.