Edhe Franca do rivendosje të vizave për Shqipërinë?

Sipas Ministrisë së Brendshme Franceze, Shqipëria mban vendin e parë të numrit të azilkërkuesve për vitin 2017, me 7256 sish

E përditshmja franceze “Le Figaro” shkruan se shteti francez është duke shqyrtuar mundësinë që të kërkojë rivendosjen e vizave për  Shqipërinë në rast se azilkërkuesit vijojnë të abuzojnë. Për një mundësi të tillë pati raportime muajin e kaluar se po e shqyrtonte edhe Holanda.

Sipas të dhënave zyrtare të Ministrisë së Brendshme Franceze të publikuara në të përditshmen Le “Figaro”, Shqipëria mban vendin e parë të numrit të azilkërkuesve për vitin 2017. Prej janarit, rreth 7,256 shqiptarë kanë paraqitur kërkesë për azil në Francë, një shifër 178,9 % më e lartë krahasuar me të njëjtën periudhë të vitit të kaluar.

“Për të kontrolluar situatën, Parisi është detyruar të kërkojë për Shqipërinë të njëjtat klauzola mbrojtëse që kërkoi për Gjeorgjinë dhe Ukrainën: një rivendosje të vizave në rast të abuzimit me mikpritjen,” shkruhet në të përditshmen franceze.

Sipas gazetës së përmendur, të paktën 3 avionë kanë mbërritur nga Franca në Tiranë këtë verë, me shqiptarë të cilëve u është refuzuar kërkesa për azil. Referuar edhe Holandës, Franca e sheh me shqetësim edhe aktivitetin kriminal në rritje të grupeve shqiptare.