Vëzhgohen azilkërkuesit në Shqipëri

Policia shqiptare kohët e fundit ka vënë re se shumë persona po përdorin edhe dokumente, letërnjoftime apo viza të falsifikuara për të dalë jashtë Shqipërisë

Ilustrim

Për të parë më afër masat e marra nga autoritetet shqiptare për frenimin e azilkërkuesve, në Shqipëri po qëndrojnë një oficer i policisë britanike, një i asaj franceze dhe një i asaj italiane.

Oficerët e huaj në bashkëpunim me policinë shqiptare po monitorojnë hyrje-daljet dhe shkëmbejnë informacione me homologët mbi personat që dyshohet se lënë territorin shqiptar me qëllim kërkimin e azilit në zonën Schengen.

Tre oficerët e policive partnere monitorojnë lëvizjet në aeroportin e Rinasit, ku dhe fluksi i lëvizjeve është më i lartë, ndërkohë që mbahet kontakt i vazhdueshëm edhe me zyrën e misionit Frontex që operon në Shqipëri, bëjnë të ditura mediat shqiptare, përcjell albinfo.ch.

Kohët e fundit policia shqiptare ka vënë re se shumë persona po përdorin edhe dokumente, letërnjoftime apo viza të falsifikuara për të dalë jashtë Shqipërisë. Vetëm gjatë gushtit, policia ka refuzuar daljen nga vendi të 177 shtetasve, të cilët nuk plotësonin kriteret e vendosura për të kaluar kufirin.