Basha: “Rama 1”, qeveria e dështimit

Lulzim Basha tha se këto ishin vitet e ferrit për shqiptarët dhe se nëse zgjedhjet do të kishin qenë të lira Rama nuk do të ulej në postin e kreut të ekzekutivit

Kryetari i Partisë Demokratike në Shqipëri, Lulzim Basha në fjalimin e parë në Kuvend si kryetar i opozitës, ka kritikuar ashpër qeverinë “Rama 1” të cilën e ka quajtur të dështuar.

“Para 4 viteve, Edi Rama erdhi këtu si kryeministër dhe premtoi 300 mijë vende pune, shëndetësi falas, ulje taksash, hapje të negociatave për anëtarësim, etj. Dje, fiks pas 4 vitesh rikthehet në të njëjtin vend pa mbajtur asnjë premtim me shpresën se koha amniston dhe se do t’ia hedhë”, ka deklaruar Basha, përcjell albinfo.ch.

Basha tha se këto ishin vitet e ferrit për shqiptarët dhe se nëse zgjedhjet do të kishin qenë të lira Rama nuk do të ulej në postin e kreut të ekzekutivit.  “Kjo qeveri është e kapur nga krimi i organizuar. Qeveritë e huaja i dhanë ultimatum “Rama 1-shit” që të shkarkonte ministrin e Brendshëm, si person i lidhur direkt me qarqet e krimit. DASH e futi Shqipërinë në listën e zezë të vendeve kryesore për trafikun e drogës dhe pastrimin e parave”, ka thënë Basha.

Më tej ai ka përmendur edhe refuzimin e vizës nga Ambasada e Shteteve të Bashkuara për kryetarin e Kuvendit, Gramoz Ruçi, si dhe caktimin e Fatmir Xhafajt ministër të Brendshëm, kur vëllai i tij kërkohet nga drejtësia italiane për trafik droge.