Qeveria me më pak ministra në histori

Qeveria “Rama 2” ka hyrë në histori me vetëm 15 ministri. Ndërkohë, qeveria e kaluar kishte 21

Foto Ilustrim

Qeveria “Rama 2” ka vetëm 15 ministri dhe ka ‘thyer rekordin’, duke pasur më së paku ministri në 25 vjetët e fundit.

Për nga numri i ministrave, kjo është qeveria më e vogël që ka njohur Shqipëria në shumë kohë, raporton “BIRN”.

Qeveria më e madhe për nga numri i ministrave ka qenë qeveria ‘Meta 2’ e cila pati një jetë të shkurtër në fund të vitit 2001 dhe fillim të vitit 2002. Ajo qeveri pati plot 22 vetë ministra.

Qeveria ‘Berisha 1’ pati 16 ministra. Synimi i deklaruar i ish-kryeministrit Sali Berisha në atë kohë qe që ta bënte qeverinë e tij edhe më të vogël për nga numri i ministrave, por u detyrua të tërhiqej, kur iu kërkua që Ministrinë e Integrimit, të krijuar në vitin 2001, ta ruante edhe gjatë qeverisjes së tij.

Në ndryshim nga ‘Berisha 1’, qeveria ‘Rama 2’ e ka hequr Ministrinë e Integrimit, por dallimi tjetër i madh është që qeveria aktuale ka edhe dy ministra pa portofol, ndërkohë që qeveria ‘Berisha 1’ nuk kishte ministra të tillë.

Si për ironi kryeministri Edi Rama do të jetë personi që ka udhëhequr njëkohësisht një nga qeveritë më të mëdha dhe qeverinë më të vogël. Qeveria e tij “Rama 1” kishte në total 21 ministra, vetëm një më pak se sa rekordi historik i “Meta 2”.