Shteteve të BE-së, nga 10 mijë euro për çdo migrant legal që do të pranojnë

Përmes këtij veprimi synohet të pengohet migrimi ilegal, është arsyetimi i kësaj mase që e ka dhënë kreu i komisionit për migrim, Dimitris Avramopoulos

KEYSTONE

Përkundër faktit se shpërndarja e refugjatëve në Evropë ka shkaktuar debate të ashpra, Komisioni i BE-së planifikon të sjellë ende migrantë tjerë në Evropë. Sipas komisionit në fjalë, shtetet anëtare të BE-së duhet të pranojnë vullnetarisht edhe 50 mijë migrantë, shkruan spiegel.de.

Përmes këtij veprimi synohet të pengohet migrimi ilegal, është arsyetimi i kësaj mase që e ka dhënë kreu i komisionit për migrim, Dimitris Avramopoulos.  Nga kjo do të përfitonin në radhë të parë njerëzit nga Nigeria. Sudani, Çadi, Etiopia etj. Si kundërshpërblim për pranimin e këtyre migrantëve, shtetet pranuese do të marrin nga 10.000 euro për secilin migrant. Shuma në dispozicion për këtë qëllim arrin në 500 milionë euro.

Komisioni po ashtu mendon që t`u lejojë edhe organizatave private të bëjnë organizimin e rivendosjes së migrantëve. Komisioni i BE-së e vlerëson si të suksesshme politikën e vet të migrimit të udhëhehequr gjatë dy viteve të fundit.

Ndërkaq, synimi që BE para dy vitesh i kishte vënë vetes për rindarjen e refugjatëve në mesin e anëtarëve, ka dështuar, edhe për shkak të rezistencës së një numri të shteteve anëtare. Në shtator të vitit 2015 shtetet e BE-së patën vendsour me shumicë që gjatë dy viteve vijuese të pranonin deri në 120 mijë  refugjatë tëzbarkuar në Itali dhe në Greqi.

Me këtë propozim, Komisioni i BE-së dëshiron të krijojë një kuadër të ri për pranimin e migrantëve në mënyrë direkte nga vendet e treta. Me një program të ngjashëm, shtetet e BE-së, që nga korriku i vitit 2015 e deri tash, kanë pranuar rreth 23 mijë veta.

Në të njëjtën kohë, komisioni kërkon që BE-ja t`i mbrojë më mirë kufijtë e vet të jashtëm.