Ministri Xhafaj kërkon nga policia përgjegjësi në luftimin e krimit

"Pjesë e këtij shërbimi do të jenë vetëm njerëz profesionalisht të aftë dhe me integritet të lartë moral”

Ministri i Brendshëm i Shqipërisë, Fatmir Xhafaj, u është drejtuar me një mesazh punonjësve të Policisë së Shtetit, në të cilën shpreh mirënjohje për policinë dhe inkurajon për të luftuar krimin dhe për të triumfuar mbi të.

“Do të duhet të ndajmë nga trupi i shëndetshëm i Policisë së Shtetit çdo gjymtyrë të gangrenizuar, të lidhur me krimin, të vënë në shërbim të tij apo dhe që ka fjetur gjumë përpara krimit. Për këtë arsye, akti im i parë si ministër i Brendshëm shënoi nisjen e procesit për organizimin e Vetting-ut për të gjithë punonjësit e Policisë së Shtetit.

Pjesë e këtij shërbimi do të jenë vetëm njerëz profesionalisht të aftë dhe me integritet të lartë moral”, shkruan Xhafaj në letrën e tij.