Zjarri u merr jetën 5 vetave, 4 prej të cilëve, fëmijë

Policia ndërkohë ka arrestuar si të dyshuar për zjarrvënie të qëllimshme një banor 28 vjeçar të ndërtesës

Natën e mbrëmshme, një zjarr që ka shpërthyer në një ndërtesë kolektive banimi në Mulhouse të Francës (në afërsi të kufirit me Zvicrën) u ka marrë jetën pesë personave, katër prej tyre fëmijë dhe një i rritur.  Tetë persona të tjerë kanë pësuar nga veprimi i tymit dhe gazit. Tre prej tyre, sipas gazetës regjionale “L`Alsace” janë transportuar në gjendje kritike në spitalet e afërme.

Policia ndërkohë ka arrestuar si të dyshuar për zjarrvënie të qëllimshme një banor 28 vjeçar të ndërtesës.

Kryebashkiaku i qytetit, Jean Rottner ka thënë për mediat se është tmerr ajo që ka ndodhur me banorët e kësaj ndërtese. Ai ka shtuar se ndërtesa ka qenë në gjendje shumë të mirë para kësaj, transmeton albinfo.ch. Rotnner duke iu referuar zjarrvënies është shprehur i shqetësuar se kjo ka ndodhur në  një qytet si Mulhouse, “i cili deri tash ka qenë i njohur si një qytet i qetë dhe pa problene të veçanta”.

Mbi 50 zjarrfikës kanë marrë pjesë në aksionin e fikjes së zjarrit mbrëmë.

Viktimat e zjarrit janë: një vajzë 9 vjeçe, një djalë 11 vjeçar, babai i tij 53 vjeçar si dhe dy vëllezër, 6 dhe 7 vjeçarë.

Shumica e banorëve të kësaj ndërtese janë me prejardhje të huaj.