Kthehen maskat në Shqipëri, plagosen dy persona

Dy të rinj kanë mbetur të plagosur me mjete të forta mbrëmjen e së hënës në Tropojë, teksa persona të armatosur dhe me maska u kanë zënë pritë.

Ngjarja ka ndodhur rreth orës 22:30, në aksin rrugor Tropojë- Lekbibaj, në vendin e quajtur “Shkëmbi i Rajzes”, njoftojnë mediat në Shqipëri, përcjell albinfo.ch.

“Shtetasit F.M., 29-vjeç dhe E.R., 27- vjeç, të dy banues në Lekbibaj, kanë qenë duke u kthyer në shtëpi me makinë kur janë ndaluar nga persona të maskuar, të cilët kanë qëlluar me armë zjarri në ajër.

Më pas ata i kanë goditur me mjete të forta. Të dy personat ndodhen në spitalin e Tropojës dhe janë jashtë rrezikut për jetën. Personat ende të paidentifikuar gjatë largimit i kanë vënë flakën edhe makinës me të cilën të dy po udhëtonin”, thuhet në njoftimin e policisë së shtetit.

Po ashtu theksohet se grupi hetimor në vendin e ngjarjes ka gjetur dhe ka sekuestruar në cilësinë e provës materiale disa gëzhoja arme zjarri dhe po vazhdon punën për zbardhjen e ngjarjes, identifikimin dhe kapjen e autorëve.