Shembja e gurëve mbyt tre persona në Shqipëri

Sipas mediave shqiptare, tre personat që humbën jetën janë dy vëllezër dhe një grua shtatzënë

Një ngjarje tragjike ka ndodhur në Shqipëri. Tre persona kanë humbur jetën pasditen e kësaj të shtune, si pasojë e shkëputjes së një masivi shkëmbor, raportojnë mediat shqiptare.

Ngjarja ka ndodhur në aksin Torovicë-Malecaj, në Lezhë, kur masivi shkëmbor është shkëputur dhe ka zënë një makinë poshtë, përcjell albinfo.ch.

Bëhet fjalë për një “Land Rover” me targë “AA 322 CV”, ku udhëtonin tre personat që kanë humbur jetën.

Në vendin e ngjarjes ndodhen disa patrulla të policisë, ndërkohë që dyshohet që shkak i shkëputjes të jetë bërë moti i keq me reshje që përfshiu Shqipërinë gjatë orëve të natës dhe paradites.

Ndërkohë, sipas mediave shqiptare, tre personat që humbën jetën janë dy vëllezër dhe një grua shtatzënë.