Greqia, parajsa e të korruptuarve shqiptarë

Ministria greke e Financave ka konfirmuar se Greqia është shndërruar në një parajsë fiskale për zyrtarët e korruptuar të Shqipërisë.

Sipas hetimeve të agjencive greke të Inteligjencës financiare në bankat greke janë depozituar miliona euro nga individë shqiptarë, të cilët nuk janë emigrantë atje, por zyrtarë të administratën publike në Shqipëri, ose ish-punonjës të saj, raporton “TCH”.

Nga hetimet ka rezultuar se, këta individë depozitojnë “cash” shuma që sillen nga 10 deri në 500 mijë euro, ndërkohë që në shumë raste përdorin kasafortat e bankave, për të depozituar aty sende me vlerë, përcjell albinfo.ch.

Fluksi i miliona eurove nga Shqipëria drejt Greqisë ka vënë në lëvizje qeveritë e të dyja vendeve. Burime nga Ministria greke e Financave thonë se, brenda vitit të ardhshëm, Greqia dhe Shqipëria do të nënshkruajnë një marrëveshje për shkëmbimin e të dhënave kundër evazionit fiskal dhe pastrimit të parave.

Nënshkrimi i marrëveshjes nënkupton se autoritetet do të shkëmbejnë informacione, jo vetëm për transferta, apo gjendjen fiskale të bizneseve dhe individëve që kanë aktivitet në të dyja vendet, por edhe mbi depozitat e tyre në bankat e vendeve respektive.