Saimir Tahiri ‘përjashtohet’ nga Partia Socialiste

Saimir Tahiri është përjashtuar nga grupi parlamentar i Partisë Socialiste dhe të gjitha forumet e partisë, pas skandalit të fundit, në të cilin Tahiri dyshohet se ishte pjesë e një rrjeti për trafikim droge.

Lajmin e ka bërë të ditur kryeministri shqiptar Edi Rama në mbledhjen e mbajtur të këtij grupi parlamentar.

“Ne nuk jemi këtu për të mbrojtur të vërtetën e Saimir Tahirit, por për të bërë detyrat e mëdha që kemi për të qeverisur Shqipërinë. Saimiri do të jetë deri në përfundim të këtij procesi një njeri i lirë dhe deputet i lirë për të bërë betejën e tij, ashtu si do ta mendojë ai jashtë forumeve të partisë dhe jashtë grupit parlamentar të PS”, ka thënë Rama, sipas medieve shqiptare.

Ai më pas ka deklaruar se dëshiron t’u japë kohë institucioneve të kryejnë hetimet dhe ka kërkuar që të lëshohet detyrim për paraqitje në policinë gjyqësore, por jo edhe arrestimi i ish-ministrit Tahiri.