PD-LSI, bashkë për arrestimin e Tahirit

Partia Demokratike dhe LSI kanë hartuar një raport prej 22 faqesh, në të cilën kërkojnë pranimin e kërkesës së prokurorisë për hetimin dhe arrestimin e deputetit Saimir Tahiri, i dyshuar për trafikim të lëndëve narkotike si pjesë e një grupi kriminal.

Opozita bën një pasqyrë të zhvillimeve kur në tetor 2017 në Itali është arrestuar Moisi Habilaj dhe disa shtetas të tjerë, të dyshuar për veprën penale të trafikimit të narkotikëve.

“4 vjet kishin zhvilluar qetësisht trafikun ndërkombëtar të drogës, për bisedat mes familjarëve Habilaj dhe anëtarëve të grupit të strukturuar kriminal, që dëshmonin për kontakte të shpeshta me deputetin Saimir Tahiri dhe për lidhje të ngushta me të, gjer tek dhënia e dhuratave dhe e shpërblimeve të paligjshme, për veten, familjarët dhe partinë politike të tij që t’i përdorte për zgjedhje, si pasojë e krijimit prej tij të mbështetjes dhe lehtësimit për trafikimin ndërkombëtar të narkotikëve”, thuhet në raportin e PD-LSI-së, përcjell albinfo.ch.