Italia e Rusia prijnë për shkëmbime mallrash në portin e Durrësit

Shqipëria ka shtuar shkëmbimin e mallrave me Italinë, Rusinë dhe Turqinë përmes portit detar në Durrës.

Gjatë 9 muajve të parë të këtij viti, ky port ka shkëmbyer më shumë se 2.1 milionë tonë mallra, gjithsej me 63 porte të ndryshme, nga ato të vendeve të Mesdheut deri në ato në SHBA, Kinë apo Brazil.

Italia dhe Rusia zënë dy vendet e para, përkatësisht me nga 21% të numrit të përgjithshëm të mallrave të transportuara me anije nëpërmjet portit, të ndjekura nga Turqia me 14% të shkëmbimeve. Më pas renditen Malta me 7%, Greqia me 6%, Kina dhe Egjipti me nga 5% secila e më tej Spanja, Gjermania, SHBA dhe Turkmenistani.

Sipas të dhënave nga Sektori i Statistikave në port mësohet që anijet që janë nisur nga Durrësi apo kanë arritur aty, kanë shkarkuar ose ngarkuar mallra të ndryshme në 63 porte të 20 vendeve të botës. Kryesojnë Turqia me 16 porte dhe Italia me 12, shkruan “Top-Channel”, përcjell albinfo.ch.