Gjendet “pajisja më e vjetër për navigacion”

Arkeologët thonë se ky instrument një kohë ishte përdorur nga marinarët për të matur largësinë e diellit gjatë udhëtimeve të tyre

Një artefakt i gjetur në një anije të mbytur në brigjet e Omanit besohet se është pajisja më e vjetër e përdorur për navigacion.

Arkeologët thonë se ky instrument një kohë ishte përdorur nga marinarët për të matur largësinë e diellit gjatë udhëtimeve të tyre.

Besohet se kjo pajisje datonte mes viteve 1495 dhe 1500, shkruan albinfo.ch.

Anija në të cilën u gjet kjo pajisje quhej “Esmeralda” dhe ishte pjesë e një flote të drejtuar nga hulumtuesi portugez Vasco de Gama, personi i parë që lundroi direkt nga Evropa në Indi.

“Është privilegj i madh që të gjesh diçka kaq të rrallë, me rëndësi të madhe historike, diçka që do të studiohet nga komuniteti arkeologjik që do të japin analizat e tyre”, ka thënë David Mearns, që ka udhëhequr hulumtimin.

Kjo pajisje ishte gjetur në vitin 2014 nga Mearns, dhe ishte një nga 3000 artefaktet e zbuluara gjatë një serie zhytjesh. Disku i bronztë ka diametër 17.5 centimetra dhe është më i hollë se 2 milimetra.