Vajzat në Tiranë shfrytëzohen për prostitucion për 50 deri në 150 euro

Policia në operacionin e koduar “Taksi e lirë 2” ka arritur të arrestojë 10 persona, të cilët po merreshin me prostitucion në kryeqytetin shqiptar.

Policia thotë se tre persona të tjerë janë shpallur në kërkim, të cilët dyshohet se kanë kryer veprën penale “shfrytëzim prostitucioni”, transmeton albinfo.ch.

Vajzat e moshave të ndryshme, sipas policisë, shfrytëzoheshin në hotele të Tiranës për një çmim që shkonte nga 50 deri në 150 euro.

“Aktiviteti kriminal lehtësohej nëpërmjet aktivitetit si taksist të shtetasve R.G. dhe G.K., duke bërë të mundur transportimin e vajzave që ushtronin prostitucion në hotele dhe ambiente që njehsohen me to, të tilla si ambienti “Hotel” pranë kryqëzimit të “Tregut elektrik”, në pronësi të shtetasit A.N. Gjatë arrestimeve të bëra, në disa prej ambienteve është gjetur lëndë narkotike e llojit kokainë, të cilat janë sekuestruar. Në këtë operacion janë sekuestruar në cilësinë e provave materiale: 2 automjete, 9 aparate telefonike, 1 dozë kokainë si dhe një shumë prej 10.000 lekësh”, thuhet në njoftimin e policisë.