Gazeta austriake: Rama dhe Vuçiç po luajnë me kufijtë në Ballkan

"Der Standard" shkruan për lojën mes Kryeministrit Edi Rama dhe Presidentit Aleksandër Vuçiç për të thithur sa më shumë shtetas të kosovës që të marrin pasaportën shqiptare apo serbe

Gazeta më e madhe austriake “Der Standard” ka publikuar një analizë për Shqipërinë dhe Serbinë. Më konkretisht e përditshmja shkruan për lojën mes Kryeministrit Edi Rama dhe Presidentit Aleksandër Vuçiç për të thithur sa më shumë shtetas të kosovës që të marrin pasaportën shqiptare apo serbe. Analiza e gazetares Adelheid Woelfl, titullohet “Serbia dhe Shqipëria luajnë me kufijtë e Ballkanit”, përcjell albinfo.ch

Kjo e fundit thekson se krahas presidentit serb, politikën e “fqinjësisë” e ka zbuluar edhe kryeministri i Shqipërisë, Edi Rama. “Ai jo vetëm është përzier  në politikën e partive politike shqiptare në Maqedoni, por ka emëruar edhe katër shqiptarë nga Kosova si zëvendësministra. Dhe, ai paralajmëroi që do të lehtësojë qarkullimin në pikën kufitare me Kosovën”, shkruan Der Standard për Ramën.

Gazeta e njohur shkruan se e gjithë kjo po ndodh në të njëjtën kohë kur po zhvillohet dialogu ndërmjet Kosovës dhe Serbisë. Në analizë theksohet se marrëveshja historike ndërmjet Kosovës dhe Serbisë mund të çojë te një njohje indirekte e Kosovës nga Serbia. Por autorja Woelfl, nënvizon se rivendosja e kufijve në vija etnike, jo e bazuar në integritet territorial, është në interes të dy personave.