Vdes bosi i mafias siciliane

Ka ndërruar jetë në spital për shkak të kancerit, bosi famëkeq i mafias siciliane Salvatore “Toto” Riina, shkruajnë mediat ndërkombëtare.

87-vjeçari, bosi i dikurshëm i organizatës së frikshme kriminale Coas Nostra, u burgos në vitin 1993, përcjell albinfo.ch.

Riina po vuante një dënim me 26 burgime të përjetshme dhe besohet se ka urdhëruar më shumë se 150 vrasje. Ai ishte në gjendje kome prej ditësh dhe familjes së tij i ishte dhënë leje speciale për ta vizituar në pavijonin burg të spitalit të Parmës.

Edhe djali më i madh i tij, Giovani, gjithashtu është në burg dhe po vuan dënim me burgim të përjetshëm.

Riina u shpall fajtor si urdhëruesi i një serie vrasjesh dhe sulmesh me bomba në Romë, Milano dhe Firence në vitin 1993.

Një vit më herët dy gjykatës anti-mafia, Giovanni Falcone dhe Paolo Borsellino, u vranë në luftën e Riinës kundër shtetit dhe sipas analistëve ishin pikërisht këto dy vrasje që shënuan fundin e bosit dhe perandorisë së tij mafioze.