Presidenti Trump uron Metën për 105 vjetorin e Pavarësisë

Në një telegram urimi, presidenti i SHBA-ve, Donald Trump thotë se “jemi bashkë me ju teksa festoni këtë ditë të veçantë”

Presidenti i Shteteve të Bashkuara të Amerikës, Donald Trump ka uruar presidentin e Shqipërisë, Ilir Meta në 105 vjetorin e pavarësisë së Shqipërisë, në një telegram urimi, i cili thotë se “jemi bashkë me ju teksa festoni këtë ditë të veçantë”.

“I dashur Zoti President. Ndërsa ju festoni 105-vjetorin e Pavarësisë më 28 Nëntor, populli i Shteteve të Bashkuara më bashkohet në urimin për popullin shqiptar. Në këtë ditë ne konfirmojmë miqësinë tonë të fortë dhe përkushtimin ndaj Shqipërisë si dhe presim që ta fuqizojmë edhe më tej këtë marrëdhënie gjatë viteve të ardhshme”, shkruan Trump.

“Dy kombet tona kanë zhvilluar një bashkëpunim të thellë që na ka lejuar të punojmë së bashku për të trajtuar çështje me rëndësi globale. Ju falënderojmë për rolin tuaj si partner vendimtar në promovimin e qëndrueshmërisë rajonale dhe luftën kundër ekstremizmit si dhe mbështetjen tuaj anembanë botës si një Aleat i NATO-s dhe vend anëtar i koalicionit për Shkatërrimin e ISIS-it:, thuhet më tej në urim.

Këtë vit, siç thuhet në mesazh, SHBA ka mirëpritur zbatimin nga ana e Shqipërisë të reformave kyçe të drejtësisë, të cilat e kanë sjellë vendin më afër qëllimit për të hyrë në Bashkimin Evropian dhe bashkëpunimit më të madh rajonal.

“Ne e lavdërojmë përparimin që ka shënuar Shqipëria në drejtim të integrimit euro-atlantik dhe të sigurimit të paqes e begatisë për të gjithë shqiptarët. Jemi bashkë me ju teksa festoni këtë ditë të veçantë dhe iu uroj Ju dhe popullit shqiptar gjithë të mirat gjatë vitit të ardhshëm!”, thuhet në mesazhin e presidentit amerikan për presidentin shqiptar.