Eksploziv pranë tregut të Krishtlindjes në Potsdam

Policia gjermane ka njoftuar se ka gjetur eksploziv ose material të ndezshëm në Potsdam dhe se ka evakuar një pjesë të tregut të Krishtlindjeve në këtë qytet në lindje të Gjermanisë, shkruajnë mediat gjermane, përcjell albinfo.ch.

Deklarata e policisë erdhi pasi autoritetet bllokuan qendrën e qytetit për t’i mundësuar forcave speciale të shqyrtojnë objektin e dyshimtë që gjendej pranë tregut të Krishtlindjeve.

Pajisja ishte dërguar në një farmaci në qytetin në fjalë, në jugperëndim të Berlinit, duke shkaktuar evakuimin e të gjithë tregut aty pranë.

Policia kreu edhe shpërthimin e kontrolluar të pajisjes, që sipas gazetës “Potsdamer Neueste Nachrichten” kishte disa tela që dilnin prej saj.

Ky zbulim në Postdam, kryeqyteti i shtetit gjerman të Brandenburgut, vjen pas rritjes së alarmit në tregjet e Krishtlindjeve pas sulmit terrorist të vitit të kaluar në tregun “Breitscheidplatz” në Berlin ku humbën jetën 12 persona dhe 56 të tjerë u plagosën.