Erërat e forta, pezullohet lundrimi në Durrës e Vlorë

Në Vlorë sot tragetet me pasagjerë të nisur nga Italia mbërritën me vonesë, ndërsa në Durrës erdhën në kohë

Moti i ligë ka detyruar kapiteneritë në Durrës dhe Vlorë të pezullojnë lundrimin e anijeve deri të dielën, raportojnë mediet në Shqipëri, transmeton albinfo.ch.

Në Vlorë sot tragetet me pasagjerë të nisur nga Italia mbërritën me vonesë, ndërsa në Durrës erdhën në kohë.

Mësohet se era e fortë e mesditës ka mbajtur të mbërthyera në kalatat e portit detar të gjitha anijet e tonazhit të vogël e të mesëm në Durrës. Edhe anijet e peshkimit kanë pezulluar lundrimet dhe gjuetinë në det deri të dielën.

Edhe në Vlorë që prej mbrëmjes së djeshme dhe në orët e paradites erërat e fuqishme kanë bërë që transporti detar të pezullojë lundrimin.  Kjo ka bërë që edhe mjetet e tjera lundruese të mos dalin në det për të shmangur rrezikun.