Thirrja e autoriteteve: Mos blini polica jo-valide

Në të kaluarën, në disa raste, këto polica janë shitur në mënyrë abuzive të plotësuara me dorë dhe jashtë territorit shqiptar

Festat e fundvitit shënojnë kohën kur një pjesë e mirë e emigrantëve kthehen për t’i kaluar ato me familjarët në Shqipëri.

Një pjesë e mirë e tyre preferojnë që udhëtimin ta bëjnë me automjete për të cilat është e nevojshme marrja e policës kufitare.

Në të kaluarën, në disa raste, këto polica janë shitur në mënyrë abuzive të plotësuara me dorë dhe jashtë territorit shqiptar, shkruan ‘monitor’.

Për të eliminuar këtë pjesë, Autoriteti i Mbikëqyrjes Financiare ka paralajmëruar qytetarët që të kenë kujdes pasi nga data 1 nëntor këto polica raportohen online në kohë reale dhe plotësimi i tyre nuk mund të bëhet me dorë. Po kështu ato nuk duhet të blihen jashtë territorit shqiptar, përcjell albinfo.ch.

“Periudhat e fundvitit shoqërohen edhe me rritje të lëvizjeve në drejtim të Shqipërisë, prandaj duhet të tregoni kujdes me blerjen e policave të sigurimit kufitar, që të mos bini pre e abuzimeve të mundshme” thuhet në njoftimin e AMF.