Shqipëria voton kundër Trumpit për Jerusalemin

Presidenti Trump kishte thënë më herët se kombet që do të votonin kundër Amerikës do t’iu ndërpritej asistenca financiare

Asambleja e Përgjithshme e Kombeve të Bashkuara miratoi rezolutën që i bën thirrje SHBA-së të tërheqë njohjen e Jerusalemit si kryeqytetin e Izraelit.

Rezoluta u miratua me 128 vota pro, 35 abstenime dhe 9 vota kundër. Teksti i saj thotë se çdo vendim që ka të bëjë me statusin e Jerusalemit është i pavlefshëm dhe duhet anuluar, përcjell albinfo.ch.

Mes votave kundër rezolutës ishin padyshim SHBA dhe Izraeli, i cili e cilësoi OKB-në më herët një shtëpi gënjeshtrash, ndërsa mes abstenimeve bie në sy Kanadaja dhe Meksika, të cilat ndërsa kritikuan qëndrimin amerikane, gjithashtu fshikulluan edhe OKB-në se me një rezolutë të tillë të njëanshme nuk bën asgjë për paqen.

Vota e sotme ishte një moment i veçantë për Shqipërinë, që votoi kundër vendimit të presidentit Trump për të njohur Jerusalemin si kryeqytet të Izraelit dhe zhvendosjes së ambasadës amerikane nga Tel Avivi në Jerusalem.

Presidenti Trump kishte thënë më herët se kombet që do të votonin kundër Amerikës do t’iu ndërpritej asistenca financiare.