Moskë: Autobusi godet turmën e qytetarëve, së paku 4 të vdekur

Ngasësi 58 vjeçar ka thënë se kanë dështuar frerët. Ai ka aktivizuar pastaj frerin e dorës dhe pas kësaj, sipas tij, autobusi është vënë vet në lëvizje...

Sot në Moskë një autobus ka goditur një grumbull njerëzish, duke shkaktuar kështu vdekjen e së paku katër personave dhe lëndimin e mbi dhjetë sish.

Siç ka njoftuar komiteti hetues shtetëror i Rusisë, ngasësi 58 vjeçar në marrjen e parë në pyetje ka thënë se kanë dështuar frerët. Ai ka aktivizuar pastaj frerin e dorës dhe pas kësaj, sipas tij, autobusi është vënë vet në lëvizje ashtu që ai nuk ka pasur mundësi ta ndalonte atë. Kështu, autobusi ka ecur drejt nënkalimit për në stacionin e Metrosë dhe aty më në fund është ndalur, siç e tregojnë edhe fotografitë nga interneti.

Fillimisht faqe ruse të internetit kanë spekuluar për një akt terrorist, duke u nisur edhe nga numri i madh i akteve terroriste që në Rusi janë zhvilluar  gjatë viteve 2000.  Por autoritetet shtetërore janë rezervuar, duke e lënë hetimin e rastit në dorë të organeve kompetente.