Në ngjarjet kryesore muzikore të vitit – suksesi i Dua Lipës

Uebfaqja zyrtare e top-listës britanike ka përfshirë suksesin e Dua Lipës në ngjarjet kryesore muzikore të vitit 2017.

“Nëse 2017-a nuk ka treguar asgjë tjetër, ka dëshmuar se ka qenë më e vështirë se kurrë që një artiste e re të depërtojë. Megjithatë, aty ishte Dua Lipa që depërtoi për të shënuar numrin 1 në top-listën zyrtare”, shkruan kjo faqe, transmeton Albinfo.ch.

“New Rules” ishte hiti më i madh i Dua Lipës. Kësaj kënge iu deshën gjashtë javë për të arritur në maje të top-listës, por kur arriti aty qëndroi për dy javë. Katër javë të tjera qëndroi në pozitën e dytë. Kjo ishte hera e parë që një këngë nga një solo-artiste arriti në pozitën e parë, pas “Hello” të Adeles më 2015.

Dua Lipa po ashtu falë suksesit të kësaj kënge u bë artistja më e dëgjuar në Britani të Madhe në platformën “Spotify” sivjet.