UNICEF: Dhuna ndaj fëmijëve, nivele tronditëse gjatë vitit 2017

Fondi Ndërkombëtar i OKB-së për Fëmijët ka publikuar një raport, ku thuhet se shkalla e sulmeve ndaj fëmijëve në zonat e konfliktit në botë ka arritur nivele tronditëse në vitin 2017.

Në një raport të ri, UNICEF-i​​ tha se kishte shpërfillje të ligjeve ndërkombëtare të hartuara për të mbrojtur grupet më të rrezikuara.

Në Republikën e Afrikës Qendrore, fëmijët janë vrarë, përdhunuar, rrëmbyer dhe rekrutuar nga grupet e armatosura, gjatë rritjes dramatike të dhunës. Militantët e grupit terrorist “Boko Haram”, kanë detyruar të paktën 135 fëmijë në Nigeri dhe Kamerun, që të kryejnë sulme vetëvrasëse, pothuajse pesë herë më shumë se në vitin 2016, përcjell albinfo.ch.

Fëmijët myslimanë Rohingya në Myanmar pësuan dhunë tronditëse dhe të shpeshtë, pasi që u dëbuan nga shtëpitë e tyre.

E, në Sudanin e Jugut, më shumë se 19,000 fëmijë u rekrutuan në forcat e armatosura dhe në grupe tjera të armatosura.

Raporti thotë se në disa vende, fëmijët e rrëmbyer nga grupet ekstremiste pësojnë abuzim të mëtejshëm kur ata u dorëzohen forcave të sigurisë.