Pritja e Vitit të Ri 2018, zona për gra në Berlin

Masat e reja të sigurisë gjatë kremtimit në Portën e Brandenburgut kanë iniciuar një zonë të këtillë për shkak të frikës se mund të ndodhin sërish sulme seksuale ndaj grave

Organizatorët e kremtimit të Vitit të Ri në kryeqytetin gjerman për herë të parë do të krijojnë një zonë të sigurt për gratë.

Masat e reja të sigurisë gjatë kremtimit në Portën e Brandenburgut kanë iniciuar një zonë të këtillë për shkak të frikës se mund të ndodhin sërish sulme seksuale ndaj grave, sipas mediave botërore.

Pritet që festimi në Berlin të vizitohet nga qindra-mijëra njerëz dhe për këtë arsye janë futur masa strikte të sigurisë. Në sheshin përpara Portës së Brandenburgut do të ndalohet të futen çanta të mëdha të shpinës dhe pije alkoolike.

Gjatë kremtimeve të Vitit të Ri në Këln dy vjet më parë pati shumë grabitje dhe sulme ndaj grave.

Disa qindra gra pastaj raportuan se ato u sulmuan nga një grup njerëzish me origjinë emigrantësh.

Sulmet e Këlnit kanë rritur tensionet në Gjermani lidhur me fluksin e madh të refugjatëve dhe emigrantëve. Vetëm në vitin 2015, më shumë se një milion njerëz nga Siria dhe Iraku kanë mbërritur në Gjermani.