Parashikime të zymta për ekonominë e Shqipërisë këtë vit

Të dhënat zyrtare tregojnë se në tremujorin e tretë investimet e huaja ishin thuajse në të njëjtat nivele me vitin e kaluar

Foto: Keystone

Ngadalësimi i rritjes ekonomike në tremujorin e tretë të vitit të kaluar është rezultat i zbehjes së investimeve në ekonominë shqiptare. Të dhënat zyrtare nga Instituti i statistikave tregojnë se në gjysmën e parë të vitit 2017 investimet u rritën me ritme shpërthyese, gati 13 për qind krahasuar me një vit më parë. Por, në tremujorin e tretë ato u rritën vetëm me 3.8 për qind, duke ndalur rrjedhën pozitive të ekonomisë.

Të dhënat zyrtare tregojnë se në tremujorin e tretë investimet e huaja ishin thuajse në të njëjtat nivele me vitin e kaluar. Madje pritshmëritë janë që gjatë këtij viti ato të bien për shkak të përfundimit të gazsjellësit TAP dhe kaskadës së Devollit.

Sipas Bankës së Shqipërisë, kredia për ekonominë, burimi kryesor i financimit për investimet e reja, vazhdon të mbetet në ngërç.