Për 800 euro, u premtohet punë në Suedi, zbulohet mashtrimi

"Më kanë ardhur tre persona, po kam dëgjuar edhe për persona të tjerë. Është një person që ka vënë njoftime te gazeta Çelsi, me një numër suedez."

Emisioni “Fiks Fare” në TCH ka zbuluar mashtrimin që u bëhet shqiptarëve për të emigruar në Suedi. Një shqiptar përmes një gazete kërkonte punëtorë të profesioneve të ndryshme për t’i dërguar në Suedi dhe për këtë kishte publikuar edhe numrin e telefonit në njoftim.

Një mërgimtar nga Shqipëria ka rrëfyer për këtë emision se disa shqiptarë në Suedi kanë mashtruar shumë njerëz duke u premtuar punë, një të ardhme më të mirë e duku u marrë nga 750 deri në 800 euro, por pasi mbërritën atje, ata nuk u dalin në takime.

“Më kanë ardhur tre persona, po kam dëgjuar edhe për persona të tjerë. Është një person që ka vënë njoftime te gazeta Çelsi, me një numër suedez. Ky person ka vënë një emër që quhet Nikolin Prenga, disa thonë që është nga Lezha, disa thonë nga Shkodra. Disa thonë që ka edhe një emër tjetër. Këtë numër që ka ky person e kam kërkuar në Suedi, po nuk më lajmërohet”, ka rrëfyer mërgimtari.