Çmimi i banesave nuk do të ulet në Maqedoni

Një metër katror në Shkup shitet nga 900 deri në 1500 euro, në varësi se në cilën pjesë të qytetit gjendet

Çmimet e banesave dhe objekteve afariste nuk do të ulen as këtë vit. Edhe pse është rritur oferta e pasurisë së patundshme, kjo nuk do të sjellë zbritje për metër katror, thonë një pjesë e kompanive që intensivisht ndërtojnë në shtet.

Një pjesë e investitorëve thonë se stabilizimi i situatës politike ka rritur kërkesën për banesa, me çfarë është betonuar çmimi i pasurisë së patundshme, raporton ‘Alsat’.

Një metër katror në Shkup shitet nga 900 deri në 1500 euro, në varësi se në cilën pjesë të qytetit gjendet, përcjell albinfo.ch.

Banesat më të shtrenjta janë në Aerodrom, Vodno, Qendër dhe Karposh. Më të lira janë në Gazi Babë, Çair dhe Hekuranë.

Ndryshe nga Shkupi në qytetet e tjera banesat lëvizin nga 600 deri në 900 euro për metër katror.

Më të kërkuarat janë banesat me sipërfaqe deri në 60 metra katrorë dhe garsonierat. Përqindja më e madhe ose 60 për qind e banesave të shitura janë blerë nga çiftet e reja.

Shumica e këtyre banesave janë blerë me kredi, por, gjithnjë e më shumë qytetarët, në vend që në banka, kursimet i investojnë në pasuri të patundshme.

Ndërsa në Shkup, Kumanovë, Manastir, Ohër dhe qytete të tjera në Maqedonisë, në Tetovë përveç banesave rritet kërkesa edhe për objekte afariste.