Benzina më lirë në Zvicër se sa në Shqipëri

Sipas kësaj liste, çmimi i benzinës në Zvicër është 1.57 dollarë, pra më lirë se në Shqipëri, ku një litër kushton 1.61 dollarë

Shqipëria renditet në vendin e 25-të për benzinën më të shtrenjtë në botë, sipas portalit “globalpetrolprices.com”.

Çmimi për një litër benzinë është 1.61 dollarë, me gati të njëjtën vlerë si Anglia dhe Gjermania, ku një litër kushton përkatësisht, 1.63 dhe 1.67 dollarë. Në vend të parë, sipas publikimit të fundit, është Hong Kongu, ku një litër kushton mbi 2 dollarë, shkruan ‘Monitor’.

Çmim të shtrenjtë benzine, sikurse tregohet nga lista, ka Italia dhe Greqia, ku benzina është përkatësisht 1.87 dollarë për litër, përcjell albinfo.ch.

Sipas kësaj liste, çmimi i benzinës në Zvicër është 1.57 dollarë, pra më lirë se në Shqipëri.

Ndër vendet me çmimin më të ulët janë vendet prodhuese të karburanteve. Në Venezuelë aktualisht një litër benzinë kushton 0.01 dollarë. Në Shtetet e Bashkuara të Amerikës e njëjtat sasi kushton 0.73 dollarë, më pak se gjysma e vlerës në Shqipëri.

“Global Petrol Prices” publikon të dhëna të besueshme mbi shitjen me pakicë të karburanteve në 150 shtete të botës për çdo javë të vitit. Të dhënat mblidhen nga burime të besueshme si Ministritë e Energjetikës, Transportit apo Tregtisë, mekanizmave për transparencë në çmim, shoqatat e automobilave në vend; shoqatat për mbrojtjen e konsumatorëve; kompanitë ndërkombëtare të karburanteve dhe mediat lokale.