Nga 15 shkurti, lehtësohet fitimi i pasaportës për të huajt e brezit të tretë

Pos që duhet të jenë të lindur në Zvicër, aplikuesit duhet që përmes dokumenteve zyrtare ta bëjnë të besueshëm faktin sesë paku njëri gjysh ose gjyshe e tyre ka pasur të drejtë qëndrimi në Zvicër

Keystone

Të huajt e moshave të reja, pjesëtarë të gjeneratës së tretë, së shpejti do ta kenë më lehtë të fitojnë pasaportën zvicerane. Këshilli Federal ka vendosur që urdhëresa e re e cila e mundëson këtë, të hyjë në fuqi më 15 shkurt 2018, shkruan albinfo.ch duke iu refereuar një komunikate të lëshuar nga EJPD (Departamenti Federal për Drejtësi dhe Polici).

Kjo u bë e mundur pasi që, siç dihet, në referendumin e 12 shkurtit të vitit 2017, populli kishte votuar me 60.4 për qind në favor të iniciativës që kërkonte natyralizimin e lehtësuar të brezit të tretë.

Kështu, duke filluar nga 15 shkurti, të intereresuarit që i plotësojnë kushtet, mund t`i marrin formularët përkatës në Sekretariatin Shtetëror për Migracion (SEM) ose te autoritetet kompetente në vendbanimin e tyre.

Sigurisht, kjo procedurë vlen vetëm për personat e lindur në Zvicër, dhe të cilët në këtë vend kanë ndjekur së paku pesë vite shkollimin si dhe e kanë lejen e përhersghme të qëndrimit (Vizën C). Po ashtu integrimi i mirë në Zvicër është një kusht për të aplikuar.

Ata duhet që përmes dokumenteve zyrtare ta bëjnë të besueshëm faktin sesë paku njëri gjysh ose gjyshe e tyre ka pasur të drejtë qëndrimi në Zvicër, përcjell albinfo.ch. Veç kësaj, njëri prind duhet të ketë pasur Vizën C dhe të ketë qëndruar së paku 10 vjet në Zvicër.

Kërkesën mund ta bëjnë vetëm të rinjtë deri në ditëlindjen e tyre të 25-të. Por, edhe atyre të cilët më 15 shkurt 2018 kanë 26 deri 35 vjet, u mundësohet që në kuadrin e një rregullimi kalimtar që brenda pesë viteve të bëjnë kërkesë për natyralizim të lehtësuar.