Arrin në 10 numri i viktimave nga stuhia në Evropë

Erërat kanë qenë me një shpejtësi mesatare deri në 130 kilometra në orë, ndërsa në Gjermaninë Perëndimore ato kanë arritur në 203 kilometra në orë

Keystone

Ka arritur në dhjetë numri i viktimave për shkak të stuhisë që ka përshirë disa vende evropiane si Gjermaninë, Belgjikën, Holandën dhe Italinë, shkruan albinfo.ch.

Shpejtësia e erës ka arritur deri në 200 kilometra në orë, kurse dëmet janë të konsiderueshme.

Holanda dhe Gjermania kanë ndërprerë dje një pjesë të rëndësishme të shërbimeve të transportit me tren si pasojë e përkeqësimit të kushteve në vend.

Gjithashtu, një pjesë e madhe e aeroporteve kanë pezulluar fluturimet e tyre mes shqetësimeve për sigurinë e pasagjerëve. Megjithatë, vetëm disa orë më pas, situata në perëndim të vendit u përmirësua.

Por, zyrtarët e shërbimit meteorologjik paralajmëruan për goditje të vazhdueshme të stuhisë “Friederike”, me potencial të rrezikshëm.

Erërat kanë vazhduar me një shpejtësi prej 85 kilometra në orë, edhe pas përmirësimit të tyre në perëndim, ndërkohë që sipas parashikimeve pritet një stuhi e fuqishme në Gjermaninë Lindore, gjatë natës.

Erërat kanë qenë me një shpejtësi mesatare deri në 130 kilometra në orë, ndërsa në Gjermaninë Perëndimore ato kanë arritur në 203 kilometra në orë.