Grupi “Albanian Outlawz”, nga Zvicra paralajmëron albumin e ri

Anëtarët e grupit "Albanian Outlawz" jetojnë dhe veprojnë në Zvicër, vendi ku i realizojnë projektet e tyre deri te produkti final

“Albanian Outlawz”, grupi muzikor i zhanrit Hip-Hop ka lansuar projektin me videoklip të titulluar, “Still Hated”, projekt ky i cili u prit mjaft mirë nga audienca dhe adhuruesit.

Anëtarët e grupit “Albanian Outlawz” jetojnë dhe veprojnë në Zvicër, vendi ku i realizojnë projektet e tyre deri te produkti final. Ata kanë deklaruar për emisionin Exspress në KTV se nuk është shumë e vështirë që ata punën e tyre e bëjnë në këtë shtet, ndërsa thonë se nuk është e lehtë depërtimin në tregun zviceran. Tash e sa ditë anëtarët e grupit kanë paralajmëruar albumin e tyre të radhës.

Një projekt me videoklip pritet të lansohet pak para lansimit të albumit, pikërisht para datës 27 shkurt, projekt i cili pritet ta shënojë një tjetër sukses të “Albanian Outlawz”. Ata pritet që ta vizitojnë Kosovën shumë shpejt dhe të jenë afër adhuruesve këtu.

Albumi “Flej’na kur t’desëm” do t’i përmbajë 13 këngë, produksione të cilat janë të punuara nga Kollaps Beat, Niza, SourceMuzik & Cano Millano. Grupi po ashtu lajmëroi se albumi  do të jetë në shitje në të gjitha platformat, si: iTunes, Spotify, Amazon etj.