Vërshime në Shqipëri

Reshjet e dendura të fundjavës dhe prurjet nga malet e Pindit në Greqi sollën dhe fryrjen e lumit Vjosa.

Në disa zona të Vlorës dhe Fierit, lumi ka dalë nga shtrati dhe ujërat kanë nisur të hyjnë nëpër banesa. Gjatë natës dhe mëngjesit janë kryer evakuime në banesat më të rrezikuara.

Deri në këto momente, 7 banesa janë nën ujë në Novoselë e Bishan, ku ka nisur evakuimin dhe largimi i gjësë së gjallë. Në Novoselë, Forcat e Armatosura dhe policia e rendit kanë evakuuar 17 familje, raportojnë mediat shqiptare.

Në total, në qarqet Fier dhe Vlorë, nga FA janë angazhuar 150 efektivë dhe 15 mjete për evakuimin e personave dhe të bagëtive, përcjell albinfo.ch.

Sipas Qendrës së Bashkuar Operacionale, në orën 13:00 pritet që prurjet të jenë maksimale nga lumi Vjosë në Novoselë.

Lumi Shkumbin ka dalë, ndërkohë pranë Urës së Rrogozhinës dhe Çermës. Ndërsa në Gjirokastër banorët raportojnë se Ura e Hoshtevës, në Zagori, monument kulture i kategorisë së parë është rrëmbyer nga ujërat e lumit të Zagorisë.